Mi son av a daag we niem Mailo. Wahn man daag. Wi adap im fram wahn reskyu plies dong a Maiyami fram im did a wahn likl popi. Im did av wahn neks niem wen wi did get im, bot wi disaid fi giim wahn nyuu wan. Wel, chuu se wi kom fram Jamieka, wi se wi hafi pik wahn niem we rimain wi bout di ailan. Widout blingk iivn wan sekan, mi son lik out, “Mailo!” Miebi im memba di taim dem we im spen a Jamieka, espeshali wen im did likl-bit. So nou aal a unu we nuo Mailo, ar nuo bout im, nuo wa mek im niem Mailo insted a im bort niem Orayan.
Fram mi son likl-bit, im aalwiez se im waahn daag. Bot mi an mi waif ezitiet kaazn se im did yong yong, an wi did nuo se a wii did a go en op a luk aafta di daag if im get wan. Plos wi neva av no dizaiya fi tek kier a no daag. So, wi neva pie im moch main, aalduo wi did kiip it ina di bak a wi main. We paat mi kom fram, wahn plies niem Sen Tamas ina Jamieka, ina wahn likl dischrik niem Naris, daag a neva riili sinting wi did anz an glov. A no laik ou mi si di piipl dem du ya ina farin. Ina mi Naris bush, daag kudn iivn kom pan di veranda, moch muor ina di ous. Bot farin chienj wi so moch somtaim.
Sins wi a taak bout ou farin chienj wi an daag ina di siem briiz, mi memba wahn tuori wahn Jamiekan liedi wi miit ya a Flarida ierz ago tel wi. Shi se wen shi jos kom a Flarida fram Jamieka, shi yuuz tu work wid wahn fambili az wahn liv-iin elpa. Di piipl dem chriit ar gud. Dem did av a daag we dem triit laik dem pikni. Chuu shi kom fram Jamieka shi kudn andastan wa mek. Daag bied. Daag iit gud fuud. Daag gaa dakta. Daag get waak-out. Bot, muor dan evriting els, daag liv ina di ous! Eniou, fi kot a lang tuori shaat, shi se di fambili go pan vakieshan wahn taim an aks ar fi tan a di ous fi tek kier a di daag. Wel, jab a jab, an shi did niid di moni. Plos, laik mi se, di piipl dem triit ar gud-gud.
So, shi tan wid di daag. Miebi yu kyaahn kaal it se shi ton di daag sita. Shi se di fos nait shi wel a mek midnait ina di bed wen aal pan a sodn shi fiil sopm a muuv gens ar an shi jomp op, fraitn. Wen shi tek a stak, a did di daag! Im kom iina ar ruum an jomp iina di bed wid ar! It look laik se a dat im did yuus tu. Shi se di fors ting we kom a ar main a did fi kik im out. Bot den, a piis a piti staat wash ar. Di daag did alwies frenli tu ar an neva baak afta ar. Aalwies a wag im tiel wen im si ar an ron op tu ar. Plos im kliin, an aal brosh tiit. So, neks ting shi nuo, shi pul kova an kova shii an di daag, an di tuu a dem go sliip saida wananeda. So, unu si ou farin kyahn chienj piipl?
So, bak to Misa Mailo. Wi giv iin tu wi son iina di en an get im. Wi draiv go dong a di daag shelta dong a Maiyami wahn Satde maanin. Wi did eksaitid bot a kuestian wiself di siem taim. Wi eksaitid caazn se mi an mi waif fainali agrii se miebi if wi get di daag it wuda elp wi son lorn likl disiplin. Bot wi did stil a wanda if wi did a du di rait ting an mek di rait disizhan. Eniwie, wen wi riich, wi eksplien tu di nais uman ina di afis a wa wi kom fi du. Shi sen wi fi go ina di bak we dem av di kenel-dem so dat wi kuda chuuz eni popi we wi laik. Imagin se di fors popi we mi son si, im se dat a di wan im waahn! Mi tel im fi go chuu an luk pan di res bifuo im disaid. Miebi im wuda si a neks wan we im prefa muor. Bot im se noo, dat dat a di wan we im waahn. So Orayan, we a did im niem befuor Mailo, did a di wan. Wi chek im piepa-dem, mek shuor se evriting gud, sain op fi ton im gyaadian, an kyar im uom.
So, yu tingk se Mailo a fi mi son aluon nou? If yu tink so, yu a luuz yu main. Mi shuor se yu alwiez ier se daag a man bes fren. A uu fiil it nuo it. Wi get fi fiil it, so wi nuo it. Wi get so atach to im dat mi an mi waif kliem uonaship tu! At liis fi di benifit-dem, bot nat fi di trobl fi afi waak im or fiid im wen im raitful uona figat. Mek mi tel yu bout di benifit-dem, caazn se Mailo a wan fren wid nof benifit.
Mailo gi mi a vaibz we mek mi fiil gud. No mata if mi fiil dong, or mi a fret bout notn, or eni ada kaina bad wie, mi ongl afi luk pan im an it mek mi fiil gud ina mi main. Mi no ongl fiil gud ina mi main, it put wahn smail pan mi fies tu. Im av a wie fi aalwiez kom tu mi an put im ed ina mi lap an a wag im tiel, an sen di komfat rait ina mi main. Im av wahn neks stail we im aida sidong or lai dong fronta mi an gi mi wahn luk we sad an afekshanet di siem taim, wid im big blak an wait yai-dem we so brait an shain dat dem melt mi aat. Mi neva nuo, nat ina mi waildes driim, se wahn daag kuda du mi dis!
Wen mi kom uom fram work, iz laik im smel di kyar fram mi draiv chuu di front giet a di kompleks we mi liv an, askaadn tu mi waif, im kwik taim go sidong a di duor. Bai di taim mi riich an put di kii ina di lak, mi ier im a baak uol-iip. Wen mi go iin, im jomp op pan mi ar go bitwiin mi fut dem, wid im tiel a wag laik Mis Mieri tong wen shi a chat tu di nieba-dem. Iz laik se im a se mi lef im fi di uol die an im jos api fi si mi. An a di siem ting fi mi. Mi luk faawod fi siim evri taim wen die don.
Bot a no ongl mi aalwiez mis Mailo. Mi son an mi waif go chruu di siem ting. Somtaim di chrii a wi go we tugeda, yuujali pan vakieshan outa di konchri, an so wi afi buod im out. Wi aalwiez lef im wid di muos wandaful kopl we av waahn gud daag-kiipin sorvis. Dem sen wi pikcha kopl taim evri die wid im an di ada daag-dem a plie, iit, or a snogl op wid dem ina wahn kouch. Iivn duo wi get di pikcha-dem wi stil mis im. So, somtaim wen wi kom bak uom liet ina di nait, an iivn duo wi alwiez mek arienjment fi pik im op di falarin die wen taim dat apm, iz laik se wi waahn go striet fi im di muoment wi lef Maiami Ierpuot. Iz laik se wi kyaahn wiet fi siim.
Bot duo it abvios se Mailo lov di chrii a wi jos laik ow wi lov im, somtaim im no laayal ataal! Nat dat im no laayal to di chrii a wi, bot ongl nat tu mi an mi waif, kaaz im kori-fieva bad tuwaad im raitful uona. Im wuda de-de a jomp an praans roun wid mi, di tuu a wi a av nais taim tugeda, bot di muoment mi son apier, im lef mi kwik taim an rosh towaad im. Im av a naasti stail fi dis mi jos so! Somtaim mi fiil laik fi kos. An wen yu tingk se mi a di wan we alwiez a luk out fi im an a du eniting im waahn wen mi waif an mi son strik pan im. Mek mi gi unu som egzampl a wa mi miin:
Mailo ban fram go eniwe ina di kichin. Im kyahn go ina eni ada ruum dongstiers, bot di kichin aaf-limit. Enitaim mi waif ar mi son ina di kichin, im wi go rait op a di edj an strech im ed an luk iin. Iz laik wahn lain draa pan di fluor we ongl im kyahn si bot kyaahn craas. Bot, ges wa? If mi de ina di kichin aluon, im struol iin kuul-kuul an a snif pan di fluor fi si if notn drap we im kyahn iit, ar a luk pan mi a uop se mi av som kaina triit fi giim. Bot if im eva ier mi waif ar mi son futstep a kom, wan spring im spring outa di kichin! Dopi nuo uu fi fraitn indiid! Mi waif an son aalwiez komplien se mi spwail im, an a chruu. Chruu to di paint we iz laik im waahn fi kantruol mi laif nou an diktiet tu mi. Im tek chaaj a mi nou, a chrai mek mi du wa im waahn insted a di ada wie roun. Mek mi eksplien di riizn wai mi se so:
Yu si, Mailo a wahn gud daag. An wahn veri smaat wan at dat. Im veri iizi fi trien, so im veri obiidient. Stap, sidong, kom – im nuo aal a dem, an im rispek dem. Tel im paa an im riez im lef paa fi gi yu wahn luo faiv. Wn yu let im out fi do du im bizniz, im nuo fi sidong an wiet til yu put di liish pan im bifuor im redi fi dash aaf. Di trik fi trien im a fi giim wahn triit wen im rispan di rait wie tu yu komaan-dem. Laik wen im outsaid an yu tel im fi kom an wen im kom yu riwaad im wid wahn triit. Wel, mi av di abit fi giim triit liet evri iivnin. Bifuo mi giim, mi chrien im fi sidong pan di mat we de a di bak duor. So, bikaaz a dis trienin, di muoment im si mi tek op di triit bag, im rosh go sidong pan di mat. Gess wa? It riich di stiej nou we wen iivnin kom an mi no giim no triit, somtaim mi fiil im jomp op an put im paa-dem ina mi bak. Den wen mi luk roun, a wanda wai dis daag waahn sopraiz an drapkik mi, im rosh gaa di mat, sidong, an luk pahn mi. A wiet fi mi giim triit. So, if daag no smaat, a uu den? Im a trien mi fi rispan tu im komaan-dem!
Bai di wie, wi afi kierful bout sortn word we wi yuuz roun im nouadiez. Laik di word “triit.” Im nuo da wan de gud. Fram di minit wen im ier it, im rosh go pan di mat go sidong pan it. So, if mi a aaks mi waif if shi giim no triit fi di die, chuu se mi no waahn giim tumoch, mi afi spel out di word T-R-I-I-T so dat mi no kaaz im fi rosh go pan di mat. Tangk gudnis se im kyaahn spel!
Through My Periscope 